林病：完全係小人得志嘅樣版，勢利眼心胸狹口出狂言唔在講，最重點係嗰副姿態好想擺明話俾全世界知自己經已搭通哂線，好清楚主子諗乜要乜…就係可以成日係老細房出出入入然後代表老細傳聖旨，自己做埋啲仆街嘢屈人啃就搵大老細壓人嗰種人…開口埋口同同事講「哩單嘢阿乜哥決定喎，你唔係唔聽阿乜哥支笛呀？」、「阿乜哥今日請食下午茶呀，你哋今晚開OT識做啦」，結果原來每人分唔到半件腿蛋治，結果原來好多嘢加鹽加醋俾佢老點咗…不過奉勸一句，做李蓮英都要恰到好處，隊完人要識補飛，他日先可以全身而退，但鄙人相信絕大部份香港人都係俾周星馳套《九品芝麻官》個李蓮英昆咗，以為做屎弗鬼就可以得主子歡心，大家可放長雙眼睇哩種人幾時踩到老細底線…
孽瘤：昔日紅極一時，如今失勢面臨被打入冷宮嘅另一條契弟，由於佢自己知衰，就成日想擺出個梨花帶雨咁款喺大老細面前訴苦（當然佢副尊容冇可能係梨花），好想話俾人知佢冇功都有勞，要大家唔好忘記佢，到最近直情怨老細對佢唔公平…但由於佢曾經都係似勢凌人而得罪人多，而家喺高處跌返落黎，佢嘅言行當然會成為同事之間嘅笑柄…不過唔好睇少哩類人，滿肚壓抑心懷報復，但好多時處於下風嗰時都幾忍得下，一個唔覺意有人大熱倒灶俾佢「反底」，邊個寸過佢啤過佢都會出事，唔好話幫你「起機」，迫哂全公司上下幫返佢「出火」都仲得…
薯片：其實對住哩種人做你阿head係最易中咗招都唔知咩事，明明睇穿成件事就扮到一臉無知，明明係自己有份，就算唔能夠完全置身事外都可以做到無可奈何嗰隻…直頭係俾嗰班平日都係受盡壓迫，但唔知點解同理心泛濫嘅低層打工仔喺絕望之中叫做搵到啲倚靠…「唉，其實佢個位都好難做嘅」、「老細assign佢做佢都唔想」幾乎可以成為佢喺大家同事眼中嘅刻版印象，就係哩種印象可以幫佢儲定credit去做賤事，出賣咗你都未必知，知都未必會怪佢…
法官：簡單咁分析，一個老細根本唔會睇佢台戲嘅老屎弗，明知自己爭上位冇行但照樣玩吓嘢證明自己存在價值，日日返工就好似公園睇人捉棋啲阿伯咁，旁觀者又要「依牙鬆鋼」，成日窒啲同事強調公司啲「規距」唔係咁，唔識等阿叔教你…由於佢底子厚，冇人夠膽郁佢，而哩種人坐正就冇可能，造王都未夠班，但得罪佢都會好麻煩…
其實哩四種人，只要跟同一個大老細，同一班「大孖耍」出糧俾佢哋，佢哋一樣係會質屎俾你哋班細嘅食，仲係同一堆屎黎，只不過點食法你哋會容易接受啲咁解…唔知稍有社會經驗嘅你哋，你哋職場上又有冇一兩條哩啲契弟喺你左近？你哋又會點同佢哋交手？哩四種人，我見過，我真係見過，我真係通通都見過！但我唔撚識同佢哋玩！！
